Дәуірдің дара тұлғаларының ұрпақтары киелі Меркі жерінде!

Тарих - талай саңлақтың жұлдызын жағып, адамзат есінде мәңгі қалдырған. Ұлы тұлғалардың тарих бетінде сақталған ұзақ орны ұрпағымен жалғасқан. Қазақ әдебиеті мен мәдениетіне, ғылымы мен өнеріне үлес қосқан әрбір азамат біздер үшін үлкен қазына, бүгінгі ұрпақтың мәңгі жадында. Бүгін тарихқа сыр шертетін айтулы күн.
2023 жылдың 23 тамызында киелі Меркі жеріне кемеңгер тұлға Ілияс Жансүгіров пен Мұхтар Әуезовтің Фатима анамыздан тараған ұрпақтары Зифа-Алуа Әуезова мен Ғабитова Жамиля Болатовна қонақтап келді.
Кездесуге Меркі аудандық білім бөлімінің әдіскері Досмуханбетова Зульфия Мэлсқызы мен Мұхтар Әуезов атындағы жалпы орта білім беретін мектеп-лицейінің директордың тәрбие ісі жөніндегі орынбасары Н. Анисова, тарих және қазақ тілі пәні мұғалімдері қатысты.
Кездесу барысында педагогтарымыз қонақтарға Меркі өңірінің тарихын таныстырып, заңғар жазушының есімі берілген мектеп-лицейінің жетістіктеріне шолу жасаса, дарынды оқушыларымыз мәнерлеп өлең оқыды.
Ата-бабаларының табаны тиген, асыл аналарының мекен еткен киелі топырағына келген қонақтарымызға Меркі ауданының құрметті азаматы, ақын Шырын Мамасерікова өзінің қылқаламынан шыққан өлеңін арнады.
Кездесу барысында Зифа-Алуа Әуезова мен Жамиля Болатовна мектеп-лицей ұжымына өздерінің алғыстарын білдіріп, осындай жылы қабылдауға рақметтерін айтты.
Кездесу соңында құрметті қонақтарымыз мектеп-лицей жанындағы Тұрар Рысқұлов музейіне және Мұрат Әуезов туылған үйге экскурсия жасады.