Жақсылық жасап жарысайық, ағайын!

Мешіт – мұсылмандардың құлшылық ететін ғимараты. Жалпы мешіттер тарихы 622 жылдан бастау алады. Ең алғашқы мешіт те дәл осы жылы Медина қаласында тұрғызылған. Қазіргі таңда Қазақстандағы мешіттер саны 3000- ға жуық және олардың саны халқы тығыз шоғырланған оңтүстік аймақта айрықша көп. Солардың бірі Жамбыл облысы, Меркі ауданындағы «Әс-салям» мешіті. Қазіргі таңда мешіттің құрылысы жүріп жатыр. Адамгершілікке арналған үш сауап бар: Шөлге құдық қазған, өзенге көпір салған, жолға ағаш еккен. Адам қолынан келетін тағы бір сауаптың бірі - қайырымды іске көмектесу. Осы орайда Владимир Савва атындағы №9 жалпы орта білім беретін мектеп-лицейінің жас ұстаздар ұжымы аталған мешітке барып, көмек қолын созды. Мешіттің бас имамы және сондағы құрылысшыларға мектеп директоры Б.Т.Кыстауов алғы сөз айтып, мешіттің халыққа пайдасын тигізетін маңызын айтып, мешітке келудегі басты мақсат – Аллаға құлшылық ету, парыз етілген үкімдерді орындау екендігі жөнінде айта кете, құрылысшыларға жұмыстарына сәттілік тіледі.. Мешіт қоғамдағы барлық мәселенің шешімін табуға, елдегі бірліктің, ынтымақтың сақталуына тікелей себепші болатын орын. Адамның туғанынан бастап өмірден өткенге дейінгі діни рәсімдер мешітте өткізіледі. Мәселен, балаға ат қою, неке қидыру, жаназа шығару сынды көптеген діни рәсімдер мешітте орындалады. Қайырымдылық жасау қазақтың қанында ежелден бар қасиет. Асыл дініміз де мұқтаж жандарға жақсылық жасауға бұйырады. Олай болса, жақсылық жасап жарысайық, ағайын!

​https://www.facebook.com/100050434432611/videos/255625379850268/​​​