«Құндылықтар арқылы оқыту» тақырыбында шеберлік сынып

Мақсаты:

Құндылықтарға негізделген білім берудің маңызын түсіндіру

Тәрбие сағатында құндылықтарды дамытуға бағытталған әдістерді меңгеру

Бүгін біз «Құндылықтар арқылы оқыту» тақырыбында бас қосып отырмыз. Бұл – қазіргі білім беру жүйесіндегі ең маңызды бағыттардың бірі. Себебі біз тек пән оқытатын педагог қана емеспіз, әрбір оқушының тұлғалық дамуына ықпал ететін жетекшіміз, бағыт-бағдар берушіміз.

Құндылық – баланың болашақ мінезін, таңдауларын, өмірлік көзқарасын қалыптастыратын негізгі тірек. Сондықтан оқу-тәрбие процесінде жалпыадамзаттық құндылықтарды:құрмет, жауапкершілік, ынтымақтастық, еңбексүйгіштік, адалдық, мейірімділік, патриотизм сияқты қасиеттерді оқушы санасына ғана емес, жүрегіне жеткізе білу – біздің басты міндетіміз.

Сынып жетекші үшін құндылықтарға негізделген оқыту – бұл:

• сабақтан тыс іс-шаралар арқылы тәрбиелік құралдарды дұрыс бағыттау;

• сынып ішінде жағымды психологиялық ахуал қалыптастыру;

• оқушыны тыңдай білу, түсіну және қолдау мәдениетін дамыту;

• ата-анамен үйлесімді жұмыс жүргізу;

• әр әрекетінде үлгі көрсетіп, құндылықты сөзбен емес, ісімен таныта білу.

Әрбір оқушының өміріне сынып жетекші ретінде сіздердің әсерлеріңіз ерекше. Оқушы үшін құндылықтар көбіне мектептен, ұстаздан, сыныптағы ортадан қалыптасады. Сондықтан біз берген әрбір кеңес, айтқан әрбір сөз, көрсеткен әрбір үлгі – олардың болашағына бағыт болады.