«Асылдың тұяғы» тақырыбында сыныптан тыс іс-шара

Мұхтар Әуезов атындағы жалпы орта білім беретін мектеп-лицейінде қазақ тілі мен әдебиеті  пәні бірлестігінің айлығы барысында қазақ тілі мен әдебиеті пәнінің мұғалімі Абуева Л.К. Қазақтың заңғар жазушысы Мұхтар Әуезовтің ұлы Мұрат Әуезовтің  80 жылдығына орай 10 «А» сыныбының қатысуымен «Асылдың тұяғы» тақырыбында сыныптан тыс іс-шара өткізді. 

Іс-шараның мақсаты: Мемлекет және қоғам қайраткері, мәдениеттанушы-ғалым Мұрат Әуезовтің өмірі мен  шығармашылығымен таныстыру.Оқушыларды сөйлеу мәнерін, көркем әдебиетке құштарлығын дамыту. Елін сүйетін патриот,жеке тұлға тәрбиелеу.

 2023 жылғы Қазақстан мерейгерлерінің бастауы Мұрат Мұхтарұлы Әуезовтен бастау алды. Қазақтың заңғар жазушысы Мұхтар Әуезовтің ұлы, Ұлт асылының ұрпағы, қазақ елінің мақтанышы белгілі түркітанушы, мәдениеттанушы ғалым, қазақ дипломатиясының қайраткері Мұрат Мұхтарұлы Әуезов 80 жасқа толып отыр.

Іс-шара барысында оқушылар Мұрат Әуезовтің әкесі Мұхтар Әуезов және  анасы Фатима Ғабитова жайлы естеліктермен танысып, Мұрат Әуезовтің 80 жылдығына орай түсірілген бағдарламалармен, сонымен қатар «Астана» телеарнасынан «Бірегей» бағдарламасын көре отырып мол мәліметтер алды.

Биыл Мұрат Әуезовтің анасы Фатима Ғабитованың туылғанына 120 жыл толуына орай Ұлттық кітапхананың қолдауымен мектебіміздің кітапхана қоры  «Атамұра» баспасынан басылып шыққан «Өртеңде өнген гүл» атты кітабының толықтырылған жаңа нұсқасы, Әміржан Әлпейісовтің «Мұрат», Мұрат Әуезовтің «Қазақ рухы» атты кітаптарымен толықтырылды. «Өртеңде өнген гүл» атты бұл кітапта Ф.Ғабитованың күнделіктері мен өлеңдерінде қазақ қоғамының, әсіресе қазақ зиялыларының Сталиндік қуғын-сүргінге  ұшырауы, саяси қудалаудың шындығы егжей-тегжейлі суреттеледі.